Mpa vlé tètanba ankò

Woyyyyy, m santi map fou

Peyi sa ap fè m fou

M pa wè devan, m pa wè dèyè

Sitiyasyon sa ap sakaje andedan m

Tankou yon fèy bwa sèch nan latoumant

Chak jou ki jou

Wap mande kouman sa pral ye

Sou Chanmas ki pèdi lafas

Ak yon lari ki toujou nan kouri

Nan yon peyi an depèdisyon

Kot konsyans nou chak Ayisyen

Kap jwe yon jwèt mab peyi

Kote chak nèg ap teke bò ronn

Poul wè kijan lap defann grapday pal

Menmsi lot kanmarad mò rèd depi opa

Defann yon ideoloji se bel bagay

Sa pa vle di pou otan kraze brize

Ni taboularaza, ni mete nan lasoufrans

Zot ki pa mache nan menm lide

Paske yo pa wè bagay yo menm jan

Lè yon ekip foutbòl pa gen inite

Lè kotch la pa gen estrateji

Lè jwè yo ap jwé pèsonel

Ekip la pèdi tout match

Li fè fon nan tout chanpyona

Lè konsa piblik la mande anraje

Li joure, li rele, li di betiz

Li jete boutey, li voye roch

Paske li pa kontan

Tout brimad sa yo kap kraze diyite l

Li lè li tan pou chak grenn Ayisyen

Konprann e aksepte ke bati yon peyi

Se tankou bati yon kay

Fok ou jwenn tè a

Ou pa ka sezil, se achte pou achtel

Fok ou si ke tè a se yon bon tè

Ke tout papyel anrèg
E li nan zòn ki pap sibi katastròf

Fok dabò ou konnen ki jan de kay ou vle

E ki valè moun ki pral nan kay la

Si se yon bel ti kay oswa yon gro kay san figi

Eske se yon kay plat oswa aetaj

Eske lap fèt ak blok oswa roch

Eske se dal beton oswa tòl

Eske fok gen lakou oswa fok kay la sou tout tè a

Ak yon latriye kesyon ankò

Reponn kesyon sa yo mande dialog ak refleksyon

Konsètasyon ak akseptasyon ke lòt moun

Ka gen bon lide tou paske tèt ansanm

Toujou bay bon rezilta lè tou moun

Ap mache men dan la men nan menm pwojè a,

Ke chak moun pran responsabilite yo

E respekte bidjè a san kout gidon

Lè kalkil yo mal fèt e kay la gen erè,

Sa koute chè anpil e ou ka pa gen mwayen korijel

Alos ann fè yon jan pou se pa lè gen gwo van ak lapil

Ke tout moun nan kouri ak kè kase.

Ann mare kansonn nan renn pou pita pa pitris

Lè ou prevwa fè yon kay,

Fok ou kòmanse pa fouye fondatyon,

Mete fè byen marye ak siman

Pou kay la pa pè goudougoudou.

Apre fok ou fè sol, makadam, bon poto

Monte blok, koule dal.

Bèl bagay, kay ap mache

Lè kay la kanpe, tout moun kontan

Men nou poko gen kay tout bon paske

Nou poko randwi ak krepi

Pase tiyo dlo ak kouran

Kalkile fenèt, rezèvwa, pòt, fil kouran

Ak yon pil ak yon pakèt bagay ankò

Eske kalkil bidjè a te prevwa tout bagay say yo?

Eske pa gen pati nan kay la ki pran plis kob ke sak te prevwa?

Eske bòs yo touche? eske gen materyo toujou?

Eske kob ki rete a ap fini kay la?

Si pa gen ase kob: poukisa e kisa nap fè?

Eske kob la byen pase oswa mal pase?

Eksetera eksetera.

Yon bagay pou nou pa janm bliye:

Nou paka bati kay la poukontnou
Paske yon sèl dwèt pa manje kalalou.

Chak moun gen wòl pa yo

Chak moun gen metye pa yo.

Fok gen achitèk, enjenyè, fòmann, gore, mason,

Chapant, ferayè, plonbye, elektrisyen, mannèv,

Labank, transpò, manjekwit, kenkay, gadiyen

Ak yon latriye lot ankò.

Ki vle di: Fok tout moun ladann.